Eit mysterium

KVAR, KVEN, NÅR ?

Dette talande motivet set fantasien i sving. Eg fann filmen som er ei avfotografering i arkivet etter Karl Vassbotn. Då eg la det ut på Stranda Sogelag si facebookside: STRANDA SOGELAG - gamle foto, fekk eg svar frå Svein Ove Dale Østrem som viste meg til facebooksida Gamle Norddalsbilde. Der hadde bildet vore delt og Ola Relling skreiv fygjande, som eg tillet meg å kopiere i utdrag: " Kapteinhjellane 1890. Dette biletet viser huslyden på Kapteinhjellane på Rellingen i Dalsbygda i 1890, eller høgst eitt år før eller etter. Det kan tidfestast på grunn av at den unge tenestejenta til høgre, (Anne) Pernille Ruset var fjorten år då ho tente der. Frå høgre ser vi Ole Martinus Ingebrigtsen Relling ( 1802 - 1892), sonen hans, Ingebrigt Olsen Relling(1831-1903), og kona til Ingebrigt, Inger Anna Larsdotter, fødd Engeset (1828 - 1897). Inger Anna var dotter til den vidgjetne Dale-Barbraa, og tante til Pernille ( Mora til Pernille var gift på Ruset.) Pernille emigrerte seinare til USA, og heitte der Nelly Berg. Ho døydde i 1978, 102 år gammal. ..................

Opplysningane om kven personane på biletet er, har eg etter bestemor mi, Jørgine Hjelme, som var syskjenbarnet til Pernille. Detaljane om dei einskilde har eg funne i ætteboka."

Mysteriet fekk si løysing, men kva den unge jenta tenkte, der ho står - litt til sides for gardsfolket og frys på hendene, det står vi fritt til å dikte vidare om - i fantasien.